KUE CELPON
OLEH: JAKA Filyamma
Pada jaman duluk ade keluarga yeng
tinggel di kampong. Jauh ari urang ramai tiap ari hanye maen di kebon utan maen
e anye di rumah lah beari-ari. Maken pon keluargatu hanye ngarep ari hasel
kebon e atau buah-buah utan. Sebener e keluarga tu seneng, ape agik men die
idup di jaman sekarang ne apelah hal e. Keluarga tu punye due anak yeng besak,
laki Bujang name e sedengken yeng kecit Dayang. Pak kek mak e pon seneng
manggil anak e ne JANG tuk Bujang YANG
manggil dayang. Bujang kek dayang ne paling ingen maken ape bai yeng di
masek mak e. Die due beradek ni ingen ape agik pemaken yeng lom suah di tingok
e. Karena ingen maken e diorang bedue pon gati ngepong mak e masek di dapuk.
Suatu
ari pak Awang bapak Bujang kek dayang pulang dari kebon leteh bener keliet
bepikol kek karong entah ape isik e.
”Mak….O….mak……kemane ge urang di umah ne….Dak
sikok aben,” Pak Awang manggil binie tapi dak de aben jawab e..die ngarep ade
yeng kek nulong ngangkat karong e.
“Jang…… Dayang,” Pak Awang heran dak
macem biase e Bujang kek Dayang dak de keliet biase e maen di lamen umah tapi
ari tu dak de. ”Masak ge ikak tiduk cem ne ari,“ pak Awang langsong masok rumah
sudeh narok karong e di adep umah.
“Oooooooo mak ….. bujang …. Dayang
…..mane nya ikak ne,” Pak Awang agik penasaran ngape dak de aben yeng nyaot e.
” Yang ooo, Yang buet kek bak ne kupi ….,”
Saking
lah dak kawa agik mikol karong e tu, langsong di empes Pak Awang di lamen umah
e.
”Nah yem, men ikak nek maken
e…,urang lah dak renyek agik kayak e,” Pak Awang kesel dibiar e ayem maken ubi yeng lah belambor tu.
Ade pulik yeng lah patah di empes e tadik. Lom sempet aben pak Awang duduk
bujang ngerek dari dalem umah, ”Bak…. bak ..ayem ge lah langok maken ubi tiap
ari .. cube ge yeng laen.”
Kesel
mintak ampon Pak Awang nenger anak bujang e ngumong macem tu. “Ape kate ka
jang…. Lah langok maken ubi .. jadi ka nek maken ape.. jang,” kepale Bujang di
tunjel bak e.. tapi die dak ngelawa. Cuma nundok kepale ketak.
“Jang, bak ne agik leteh jangen banyek
igak tingkah lah .. ok dak kawa kelak e kene tepileng …,” Lom abis Pak Awang
ngomong la hade pulik saot dari dalem umah,
“Deng lah bak … name ge budak…..
mane tau reti e ge. Baseng e lah men nek makan men ngak sudeh … “ jangen ka
nyalah anak mecem tu bak, kesian lah kek bujang..Gi lah jang ka ngambik kayu
api … bak ka lah nek makan ne,“ Mak Awang ningin ati pak Awang sambil megang
kepale bujang nyuroh nyarik kayu api. Pak Awang ningok anek e bejalan sambil
nyiret kaki, biase lah bujang men ade yeng dak di turot merajok lah gawe e. Mak
Awang Cuma nginggel kepale. Bujang lah bejalen sampai tengah utan baru mak
Awang ngumong agik.
“Tu lah Bak jangen males igak ge ka
ne budak baru lapen taon ge tau kek langok ngerti kek lungoi…cube lah ka carik
kanti e … ape kek ikan asen ge maken ubi e, ape cecel kek madu ge.“ Yeng Pak
Awang nek care die lah… di padah malah ngalar pulik.
”Tingok ge anek sabak ne…..lom maken
aben lah ngalar ape agik lah makan. Sude to giler. Dayang pulik ngeringek,
”Mak … mak… nek makan mak … lah
laper perot ne… “ Ningok anek bini e lah megang perot mak Awang langsok ngambik
ubi yeng lah di patok ayem.
”Yo kite ke dapuk … Ka tulong mak
ok,” dayang ngikot dari belakeng sambil
ngerinyet bak e yeng lah kek mejem ningok die.
“Mak di rebus agik ok,“ tanyak Dayang kek mak e sambil ngucek ubi pakai
pisok yeng lag beritem,.. entah lah bekarat ape bekas ngucek nangkak mudak
kalok e.
“Aok, nek mak rebus sude to kite
parot .. muet kue ok,” kate mak Awang ngeringai ningok Dayang ragap ngucek ubi
e.
”Kue ape mak…,” tanyak Dayang agik.
“Entah lah Yang di buet ape mak ge
lom tau, mane jadi elah kelak yeng penteng pacak di makan dak lungoi agik ok..”
“Aok lah mak basing mak lah,” Dayang
ge jadi lesu piker e ape kek makan ubi rebus bujang agik ari ne.
”Lah sudeh Yang ok ka ngucek e,”
tanyak mak Awang ningok Dayang lah tiduk di letot e sambil dudok.
“Jadi lah mak ok bantot ase e,”
Dayang berangket mawak ubi yeng lah di kucek e ke perigi belakeng umah. “Bersih men yang masuh e,” kate mak
Awang sambil nyebu tunggkuk pakai bambu. Dayang diem bai sambil mawak ubi yeng
lah di basuh e ke dapuk agik langsong di tuang e ke dalem panci.
”Lah mak ok ku nek nyusol akak luk
nyarik kayu,” kate Dayang lari kecit keluar umah liwat dapuk. Lom ateng tujuh
taon umor dayang tiap ari gi ke utan men dak nyarik kayu ngikot mak e nyiang
bambu kek di ambik rebong e. sedengken pak Awang lah kedenger keroh e lah
sampai ke mekah senen kalok e .
Pulang
dari nyarik kayu bujang kek dayang langsong ke dapuk di tingok e mak Awang tengah numbok ubi rebus dalem
lumping.
“Nek muet ape nya mak,” tanyak
Bujang. “Entah kak mak ge dak tau yeng penteng kite nek maken e,” Dayang yeng
cak-cak nek madah pulik nyeneng ati akak e..yeng lah be peloh.
“Jang, gilah ka bangun bak ka …suroh mutek
kelapo …Jangen tue jangen mudak ok padah kek bak ka .. yeng sedeng cungkel
padah ok?” “OK”.
Entah
kek ape mak Awang nyuroh e, Bujang ge langsong begerek ke adep.
“Yang, cube ka putong gule kabong ne
kecit-kecit.”
Dak
banyek tanyak agik Dayang langsong ngawe ape yeng di suroh mak e. “Ndok…yang
mane nya gule kabong e lom ade aben keliet e,” selidik Mak e. Dayang dak pacak
nyaot agik mesege mulot e lah penoh kek gule kabong .
”Yang….Yang, jadi lah jangen di
maken agik….,” kate mak Awang sambil ngambik pireng tempet gule kabong iris
yeng dak sampai sepulok ikok. Ubii rebus yeng lah di tumbok tadi dikiluk pakai
tangan di keremek e macem urang nek mecah manggis di pinyet e pakai tangan baru
di tarok kek gule kabong tadik sude to di buet e bunder macem bal .
“Nek muet ape nya mak…!” Layang Dayang netap aek yok e ningok mese bundur di buet mak Awang. “ Entah lah
Yang, ka tingok bai lah kelak asal lah masek,”
Di
adep umah Bujang agik betarek-tarek kek kaen sarong pak Awang, “Bak,
bangun….mak nugak…,“ mangun pak Awang tiduk samelah kek mangun bukit dak kek
berangket men dak di sirem kek aek.
“Maaaaaak payah ge mangun bak ne
tiduk “ karoh Bujang madeh kek mak e, “Sirem kek aek,“ saot mak Awang sambil
mereh ke adep umah mawak aek seimber.
”Ujannnnnnn…..,” di sirem e aek to
ke muke laki e yeng agik tiduk. Imang dasar pak Awang macem pendekar die
bepencak burong kedidi.
“Jadi lah tiduk to…..Putik kelapo
sanin,“ kate mak Awang kesel ngulek agik ke dapuk Dayang lah luk kali lari di
adep mak e..
“Mak …. Mak …. Kue nimbul!” kate Dayang ningok kue yeng
di rebus mak e lah nguntam.
“Celep Pon…,” mak Awangge dak sadar nyaot e.. untong bai
dak di celep dayang kue dalem paek mendidih to. Men di celep la hade pulik
gawe. Dak berani nyelep e Dayang ngaroh agik … mak maken banyek mak mimbul e.
“Celep pon…!” kate mak Awang agik sambil marot kelapo
setengah tue yeng lah di kucek pak Awang tadik e.
”Dasar imang lah laki sikokne men lom di suroh dak kek
kawa die begawe,“ piker mak Awang kesel kek tingkah Pak Awang.
“Mak…. Lah kek ngerueh kue e .. ha ..ha…mak nek tumpah
lah e,“ karena lah maken banyek kue buatan mak Awang yeng nimbul . Kue tu di
angket mak Awang di tarok e di pireng yen glom di rebus di pasok pulik ke panci
yang agik mendidih tadik.
”Payah ge men panci kecit ne. nek be ulang kali ngerebus
e piker mak Awang. Dayang lah dari tadik ngadep kue yeng agik berasep.
”Lah dak tahan agik ku mak … kate e. “ kelak tarok kelapo
e duluk. kate mak Awang nyabar Dayang. Lah sudeh di tabor kek kelapo parot.
Ragap dayang maken kue tu.
“Kue ape nya ni mak?” kate bujang pulik macem ikan
benapas nahan panas kue yeng dimakan e. Mak Awang bingung, Kue ape ok … kate e.. oh… kue ape
yang,”
“Mane ku tau mak,” saot Dayang, “Tadik mak umong to … CELEP PON ……,” kate mak Awang
senyum seneng lah pacak nyawab ape yeng di tanyak anak -anak e.
Bujang
kek Dayang ge ingen maken kue to hamper tiap ari budak due beradek tu mintak
buet kue celepon. Kadang pak Awang lah dak tebagi agik.
“Tu lah bak men
galek tiduk lah abis ge Celepon e,“ kate mak Awang sambil ngulok lakie.
Sampai kinik Cue celepon agik di buet urang Bangka. Biak
lebih seger ningok e, ubi rebus tumbok tu di campor kek aek daun pandan supaya
lebih wangi kek warna e ge ijau. Cuma takot payah maken e,s kinik kue celepon
di buet agak kecit . biar seneng nulop e kalok e ….
Sungailiat ,Juli 2010
Tidak ada komentar:
Posting Komentar